මීළඟ Huawei ජංගම දුරකථනයට Google Apps ඇතුලත් කිරීම තහනම් බව Google සමාගම නිළ වශයෙන් ප්‍රකාශ කළ බව පසුගිය අගෝස්තු මාසයේදී අපි ඔබව දැනුවත් කරන්නට කටයුතු කළා මතක ඇති.
කසුන් ජයරත්න
අද දින ජර්මනියේ පැවති event එක අතරතුරදී Mate 30 ජංගම දුරකථනය එළිදැක්වීමට Huawei සමාගම කටයුතු කළ නමුත්, මේ ජංගම දුරකථන වල Google Play Store එක ඇතුළු සියළුම Google Services අන්තර්ගත නොවන බව Huawei සමාගමේ consumer products division එකේ ප්‍රධානියා වන Richard Yu මහතා පෙන්වා දෙනු ලැබුවා.
පවතින වාතාවරණය යටතේ Google Mobile Services (GMS) ඔවුන්ගේ ජංගම දුරකථන වල pre-install කළ නොහැකි බවත්, ඒ නිසාවෙන් Huawei Mobile Services (HMS) එම ජංගම දුරකථන වලට අන්තර්ගත කිරීමට ඔවුන් හට සිදු වූ බවත් ඔහු වැඩිදුරටත් ප්‍රකාශ කරනු ලැබුවා.
මේ අනුව Google Play Store එක වෙනුවට Huawei App Gallery app එක භාවිතා කිරීමට Mate 30 සහ Mate 30 Pro පරිශීලකයන් හට සිදුවනු ඇති අතර මෙහි දැනටමත් apps 45,000ක් පමණ මේ Huawei Mobile Services සමඟින් integrate කර ඇති බව ඔවුන් පෙන්වා දෙනවා.
මීට අමතරව මෙම සේවාවන් වල සංවර්ධනය සහ promotion සඳහා ඇමෙරිකානු ඩොලර් බිලියනයක මුදලක් ආයෝජනය කිරීමට Huawei සමාගම කටයුතු කරනු ලබනවා.
කොහොම වුණත් මේ Huawei Mate 30 ජංගම දුරකථනය Android 10 මගින් බළගැන්වෙන අතර මේ සඳහා Android Open Source Project එක භාවිතා කරනු ලබනවා.
චීනය තුලදී Huawei සමාගමේ සියළුම ජංගම දුරකථන වල මීට පෙර සිටම කිසිඳු Google සේවාවක් අන්තර්ගත නොවුණු බැවින් චීනයේ වෙළඳපොල ගැන වද වීමට සිදු නොවුණත්, ඔවුන්ගේ ජංගම දුරකථන යුරෝපයට අපනයනය කිරීමේදී මේවායේ වෙළඳ කටයුතු වලට මෙම තත්ත්වය තදින් බළපානු ඇති බව විශ්වාස කෙරෙනවා.
මේ ගැන වැඩිදුර විස්තර දැනගැනීම සඳහා The Verge වෙබ් අඩවිය සහ 9to5google වෙබ් අඩවිය භාවිතා කළ හැක.