Google සමාගම විසින් පසුගිය 15 වැනි දින Made by Google 2019 event එක පැවැත්වූ අතර එහිදී ඔවුන්ගේ Pixel ජංගම දුරකථන මාලාවේ අලුත්ම ජංගම දුරකථනය වන Pixel 4 ජංගම දුරකථනය එළිදැක්වීමට කටයුතු කළ බව අපි ඔබව දැනුවත් කළා මතක ඇති.
කසුන් ජයරත්න
Google සමාගම කලින් ඉදිරිපත් කල ජංගම දුරකථන වල මෙන් Google pixel 4 ජංගම දුරකථනයේ fingerprint sensor එකක් අන්තර්ගත නොවන අතර ඒ වෙනුවට face unlock තාක්ෂණය සඳහා විශේෂිත වූ sensors රැසක් අන්තර්ගත වෙනවා.
මේ Pixel 4 ජංගම දුරකථනය දැනට Android ජංගම දුරකථනයක ඇති තාක්ෂණයෙන් වැඩිම face unlock පහසුකම අන්තර්ගත කර ඇති බව බොහෝ දෙනා ප්‍රකාශ කරනු ලැබුවත්, මේ වන විට එහි ඇති විශාල දුර්වලතාවයක් පිළිබඳව වාර්ථා වෙනවා.
The Pixel 4 facial recognition works even if you're asleep / dead. That seems problematic #madebygoogle #pixel4
— Chris Fox (@thisisFoxx) October 15, 2019
අදාල ජංගම දුරකථනහිමියා දෑස් වසාගෙන සිටියද දුරකථනය unlock කල හැකි වීම මෙම දුර්වලතාවය වන අතර මෙම තත්වය යටතේ දුරකථනය භාවිතා කරන්නාගේ පෞද්ගලික දත්ත වල ආරක්ෂාව පිළිබඳව ගැටළුවක් මතු වන බවත්, මෙහිදී වෙනත් ඕනෑම අයෙකුට දුරකථනයේ හිමිකරු නිදාගෙන සිටින අවස්ථාවේ වුවද දුරකථනය unlock කිරීමේ හැකියාව ලැබෙන බව ද වාර්ථා වෙනවා.
මේ පිළිබඳව වන Google support page එකේ සඳහන් වන පරිදි වෙනත් කෙනෙකුට අදාල ජංගම දුරකථනය unlock කිරීමේ හැකියාව ඇති අතර, එයින් ආරක්ෂා වීම සඳහා ජංගම දුරකථනය ආරක්ෂිත ස්ථානයක, එනම් සාක්කුවක හෝ handbag එකක වැනි තැනක තබාගත යුතු වෙනවා.
කොහොම නමුත් iPhone වල අන්තර්ගත වන Face ID පහසුකම භාවිතා කිරීමේදී මෙම තත්ත්වය බළනොපාන අතර එහිදී අදාල පරිශීලකයා දෑස් විවෘත කරගෙන සිටීම අනිවාර්යය වෙනවා.
මෙම දුර්වලතාවය බොහෝ විට ඉදිරියේදී software update එකක් මගින් fix කරනු ඇති බව විශ්වාස කළ හැකි අතර "require eyes to be open" option එක සහිත සංස්කරණයක් පිළිබඳ තොරතුරු ද මේ වන විට අන්තර්ජාලයේ දැකිය හැකි වෙනවා.
Update: 21/10/2019 09:19PM
මේ පිළිබඳව නිළ වශයෙන් නිවේදනයක් නිකුත් කරමින් Google සමාගම ප්‍රකාශ කර සිටින්නේ, ඉහත සඳහන් කළ require eyes to be open option එක සම්බන්ධයෙන් මේ වන විට කටයුතු කරනු ලබන බවත්, ඉදිරි මාස කිහිපය ඇතුලත software update එකක් හරහා එය ලබාදීමට කටයුතු කරනු ලබන බවත් ය.
මේ පිළිබඳව වැඩිදුර විස්තර දැනගැනීම සඳහා The Verge වෙබ් අඩවිය හා CNN වෙබ් අඩවිය භාවිතා කළ හැක.