ජනවාරි 29 දිනයෙන් පසු ලියාපදිංචි නොවූ උපාංග කිසිදු දේශීය ජාල සේවාවක් සමඟ සම්බන්ධ කළ නොහැකි වනු ඇතියි.
විදුලි සංදේශ නියාමන කොමිෂන් සභාව (TRCSL) විසින් 2025 ජනවාරි 28 වන දින සිට ක්‍රියාත්මක වන පරිදි ආනයනය කෙරෙන සියලුම ජංගම දුරකථන සහ SIM පහසුකම් සහිත උපාංග සඳහා IMEI ලියාපදිංචිය අනිවාර්ය කිරීමට තීරණය කර ඇත.
මෙම තීරණය අනුව, ජනවාරි 29 දිනයෙන් පසු ලියාපදිංචි නොවූ උපාංග කිසිදු දේශීය ජාල සේවාවක් එහෙම නැති නම් Network Provider කෙනෙක් සමඟ සම්බන්ධ කළ නොහැකි වෙනවා.
2025 ජනවාරි 28 දිනට පෙර ශ්‍රී ලංකාවේ ජාල සේවා සමඟ සම්බන්ධ කර ඇති සියලුම උපාංග සඳහා මෙම නව නියාමනයේ බලපෑමක් ඇති වන්නේ නැහැ. එනම්, ඔබ දැනට (ජනවාරි 28 ට පෙර) භාවිතා කරන්න පටන්ගත් ජංගම දුරකථනය හෝ වෙනත් SIM සහිත උපාංගයක් සම්බන්ධයෙන් කිසිදු ක්‍රියාමාර්ගයක් ගත යුතු වන්නේ නැහැ.
2025 ජනවාරි 28 න් පසු නව උපාංගයක් මිලදී ගැනීමේදී එය අනිවාර්යයෙන්ම TRCSL වෙළඳ බලපත්‍රලාභී ආයතනයකින් මිලදී ගත යුතු වෙනවා. මෙහිදී වැදගත් වන්නේ එම උපාංගය නීත්‍යානුකූලව ආනයනය කර, අදාළ බදු ගෙවා ඇති බවට තහවුරු කර ගැනීමයි.
විදේශයක සිට නව උපාංගයක් මිලදී ගෙන ශ්‍රී ලංකාවට ගෙන ඒමේදී එය ලංකාවේ භාවිත කිරීමට නම්, මිලදී ගැනීමේ බිල්පත හෝ invoice එක අත්‍යවශ්‍ය ලේඛනයක් ලෙස සැලකෙන අතර, මෙහිදී උපාංගයේ නම, IMEI අංක සහ මිලදී ගත පුද්ගලයාගේ නම පැහැදිලිව සඳහන් විය යුතුයි. මෙම ලියකියවිලි සමඟ ශ්‍රී ලංකාවට පැමිණි පසු උපාංගය TRCSL හි ලියාපදිංචි කිරීමේ හැකියාව පවතිනවා.
එමෙන්ම AliExpress වැනි මාර්ගගත වෙළඳසැල් හරහා උපාංග ගෙන්වන්නේ නම්, ලියාපදිංචි තැපෑලෙන් ලැබෙන උපාංග සඳහා මධ්‍යම තැපැල් කාර්යාලයේදීම අදාළ බදු ගෙවා ලියාපදිංචි කිරීමේ පහසුකම ඔබට හිමි වෙනවා.
ඔබේ දුරකථනය සිම්පත් දෙකක් භාවිත කල හැකි එකක් නම් ඔබ ට IMEI අංක දෙකක් පෙන්වාවි.
IMEI අංකය ලියාපදිංචි දැයි තහවුරු කර ගැනීම සඳහා
Dual-SIM උපාංග සඳහා IMEI අංක දෙකක් තිබිය යුතු අතර, ඒවා වෙන වෙනම ලියාපදිංචි කළ යුතු බව මතක තබා ගන්න.
මෙම නව පියවර මගින් උපාංග ආශ්‍රිත වංචා මැඩපැවැත්වීම සහ දේශීය විදුලි සංදේශ ජාලයේ ආරක්ෂාව තහවුරු කිරීම ප්‍රධාන වශයෙන් අරමුණු වෙනවා.
කෙසේ වෙතත්, 2014 වසරේදී ද මෙවැනි නියාමනයක් ක්‍රියාත්මක කිරීමට උත්සාහ කළ නමුත් එය සාර්ථක නම් වුනේ නැහැ. දශකයකට අධික කාලයකට පස්සේ තමයි මේ නීතිය නැවත ක්‍රියාත්මක වීම ගැන නැවත ආරංචියක් ලැබෙන්නේ, මේ වතාවේ මෙහි සාර්ථකත්වය කොයි වගේ වේවිද කියන එක අපිට නුදුරු අනාගතයේදී බලාගන්න පුළුවන් වේවි.
උපාංග ආනයනය කිරීමේදී TRCSL හි අනුමැතියට අමතරව ශ්‍රී ලංකා රේගුව, ආනයන හා ආනයන හා අපනයන පාලන දෙපාර්තමේන්තුව සහ ආරක්ෂක අමාත්‍යාංශය යන ආයතනවල අනුමැතිය ද අත්‍යවශ්‍ය වෙනවා.
මේ ආකාරයෙන් ආයතන ගණනාවක අනුමැතිය හා අධීක්ෂණය යටතේ රටට ඇතුළු වන උපාංගවල නීත්‍යානුකූලභාවය සහ ආරක්ෂාව තහවුරු කිරීම තමයි අපේක්ෂා කරන්නේ.
මේ පිළිබඳව වැඩිදුර විස්තර දැනගැනීම සඳහා trc.gov.lk වෙබ් අඩවිය සහ newsfirst.lk වෙබ් අඩවිය භාවිතා කළ හැක.