Huawei සමාගම Mate 40 Pro උපාංග නිෂ්පාදනය සඳහා අවශ්‍ය කොටස් ලබාගැනීමේ බරපතළ අභියෝගයකට මුහුණ දී තිබෙන බව වාර්තා වෙයි
Huawei සමාගම අලුතෙන්ම නිකුත් කළ සිය නවතම Samartphone එක වෙන්නේ Huawei Mate 40 Pro ජංගම දුරකථනය වන අතර එය සීඝ්‍ර අලෙවිය නිසාවෙන් මේ වන විට out of stock තත්ත්වයට පත්වී තිබෙනවා.
විශේෂයෙන්ම JD.com වෙබ් අඩවිය කිහිපවරක්ම සඳහන් කළ ආකාරයට මෙම නවතම flagship උපාංගය සඳහා අධික ඉල්ලුමක් ඇතිවී තිබෙන අතර සිය වෙබ් අඩවිය තුළ සියලුම ඒකක ඉතා ඉක්මනින් විකිණී අවසන් වුණු බව සඳහන් කර තිබුණා.
කොහොම නමුත් වෙළෙඳපොළ ඉල්ලුම සපුරාලීම සඳහා අවශ්‍ය තරම් තොග නිෂ්පාදනය සඳහා Huawei සමාගම මේ වන විට අපොහොසත් වී තිබෙන බව දැනගන්නට ලැබෙන අතර ඊට හේතුව වී තිබෙන්නේ උපාංගය සඳහා අවශ්‍ය chipset වල සැපයුම දාමය බරපතළ ලෙස බිඳවැටී තිබීමයි.
විශේෂයෙන්ම මෙම Mate 40 Pro series එක සඳහා භාවිතා කරන Huawei Hisilicon Kirin 9000 chipset එක සඳහා අවශ්‍ය තරම් තොග නොලැබී යාම මෙයට ප්‍රධාන හේතුව වී තිබෙන බව දැනගන්නට ලැබෙන අතර වෙළෙඳපොළ තුළ ඇතිවී තිබෙන අධික ඉල්ලුමට අවශ්‍ය සැපයුම ලබා දීමට තම සමාගම අසමත් බව Huawei සමාගම විසින් ද සඳහන් කර තිබෙන බව දැනගන්නට ලැබෙනවා.
දැනට Huawei සමාගමට මෙම chipset නිශ්පාදනය කිරීමට හැකියාවක් නොමැති නිසා මෙම තත්ත්වය ඇති වී තිබෙන අතර, නමුත් ඉදිරියේදී ඔවුන් මේ සඳහා විසඳුමක් සොයාගනු ඇතැයි අනුමාන කළ හැකි වෙනවා.
අමෙරිකානු සම්බාධක හමුවේ Huawei සමාගමට මෙම තත්ත්වයට මුහුණ දීමට සිදු වී තිබෙන බව ඔබ දැනටමත් දන්නා කාරණාවක් වන අතර, මේ පීඩනය නිසාම චීන වැසියන් විසින් සිය රටේ නිෂ්පාදනය කරන නිෂ්පාදනවලට වැඩි ප්‍රමුඛත්වයක් ලබාදෙමින් සිටින අතර එහි ප්‍රතිඵලයක් ලෙස ගත වූ වසර දෙකක පමණ කාලයක සිට චීනය තුළ පමණක් Huawei උපාංග සඳහා අධික ඉල්ලුමක් ඇතිවී තිබෙනවා.
ඒ අනුව වෙළෙඳපොළ විශ්ලේෂකයින් පෙන්වා දෙන්නේ chipset නිෂ්පාදනය කිරීමට හෝ Qualcomm, Samsung, Mediatek වැනි සමාගම් වලින් ඒවා මිලදී ගැනීමට සමාගමට අවසර ලැබෙන තුරු, පවත්නා කොටස් අලෙවි කිරීමෙන් පසු Huawei සමාගමට Mate 40 Pro හෝ Pro Plus මාදිලි වෙළඳපොලට නිකුත් කිරීමට නොහැකි වන තත්වයක් ඇති වනු ඇති බවයි.
මේ ගැන වැඩිදුර විස්තර දැනගැනීම සඳහා Gizmochina වෙබ් අඩවිය සහ Gizchina වෙබ් අඩවිය භාවිතා කළ හැක.