iPhone 12 මාදිලිය සමඟින් සම්ප්‍රදායික Lightning Cable එක වෙනස් කිරීමට Apple සමාගම සූදානම් වන ලකුණු

Apple iPhone 12 line up එක නිකුත් වීමට තවමත් ඇත්තේ සති කිහිපයක් වන අතර ඒ නිසාම මේ සම්බන්ධයෙන් විවිධ ආකාරයේ නව ප්‍රවෘත්ති මේ වන විට වාර්තා වෙමින් පවතිනවා.

iPhone 12 ජංගම දුරකථනය සමඟින් Charging Adapter එකක් නොලැබෙන බවට වාර්තා වූ ප්‍රවෘත්තිය සමස්ත තාක්ෂණික ලෝකයම කැළඹීමට කළ අතර අපි මීට පෙර ලිපියකින් ඒ සම්බන්ධයෙන් ඔබව දැනුවත් කළා මතක ඇති.

මේ අතර iPhone 12 සම්බන්ධයෙන් වාර්තා වන නවතම ප්‍රවෘත්තිය වන්නේ ඔවුන්ගේ සාම්ප්‍රදායික Lightning Cable එක වෙනස් කිරීමට Apple සමාගම සූදානම් වන පුවතයි.

Lovetodream නම් leaker කෙනෙකු Twitter හි පළ කරන ලද සටහනක් උපුටා දක්වමින් 9to5Mac වෙබ් අඩවිය විසින් මෙම තොරතුරු වාර්තා කර ඇති අතර, එයට අනුව නවතම Apple Lightning Cable එක USB Type-C port එක සඳහා converter එකක් ලෙස සම්බන්ධ කල හැකි ලෙස නිකුත් වනු ඇති බව වාර්ථා වෙනවා.

මේ අනුව සියළුම iPhone 12 ජංගම දුරකථන සමඟින් Lightning to USB Type-C cable එකක් ලැබෙනු ඇති අතර, iPhone 11 ජංගම දුරකථන සඳහා Lightning to USB A cable එකක් ලබාදීමට Apple සමාගම කටයුතු කරනු ඇති බව වාර්ථා වෙනවා.

එමෙන්ම Braided, එහෙමත් නැතිනම් ගොතන ලද පිටත වැස්මකින් මෙම Cable එක ආවරණය වනු ඇති බව තවදුරටත් වාර්තා වන අතර කාලයක් තිස්සේ Apple පාරිභෝගිකයන් විසින් Lightning Cable එකෙහි කල් පැවැත්ම සම්බන්ධයෙන් කරන ලද පැමිණිලි වලට ප්‍රතිචාරයක් ලෙස Apple සමාගම මෙවැනි පිටත වැස්මක් එකතු කිරීමට තීරණය කර ඇති බව අනුමාන කල හැකි වෙනවා.

යුරෝපා සංගමය විසින් තාක්ෂණික අපද්‍රව්‍ය ලොව පුරා එක්රැස් වීම අවම කිරීමේ අරමුණින් සියලුම Charging Port, USB Type C විය යුතු බවට කොන්දේසියක් පැනවු අතර Apple සමාගමේ මෙම තීරණයට එයද හේතුවක් වන්නට ඇති බව උපකල්පනය කළ හැකියි.

Samsung සමාගමද මීළඟට නිකුත් කිරීමට නියමිත ඇතැම් උපාංග සමගින් Charger එකක් ලබා නොදීමට තීරණය කර ඇති බව මීට පෙර ලිපියක් හරහා අපි ඔබව දැනුවත් කළා මතක ඇති.

විශේෂයෙන් නවතම Snapdragon 875 Chipset එක $200 කට ආසන්න ගණනකින් මිල ඉහළ යාම නිසා නිශ්පාදන වියදම අඩු කරගැනීමේ අරමුණින් Samsung සමාගම විසින් මෙම තීරණය ගෙන ඇති බව මේ වන විට වාර්ථා වෙනවා.

මේ ගැන වැඩිදුර විස්තර දැනගැනීම සඳහා Independent වෙබ් අඩවිය, 9to5mac වෙබ් අඩවිය සහ BGR වෙබ් අඩවිය භාවිතා කළ හැක.