ඇමෙරිකානු ඩොළර් බිලියන 40ක මුදලකට Nvidia සමාගම විසින් Arm ආයතනය මිලදීගැනීමට කටයුතු කරයි
ජපානයේ SoftBank ආයතනය යටතේ ඇති Arm Limited ආයතනය ඇමෙරිකානු ඩොළර් බිලියන 40ක මුදලකට මිලදීගැනීමට Nvidia ආයතනය කටයුතු කර ඇති බව මේ වන විට වාර්ථා වෙනවා.
මේ අනුව Nvidia සමාගම විසින් ඩොළර් බිලියන 12ක් මුදලින් ද, ඩොළර් බිලියන 21.5ක් Nvidia සමාගමේ කොටස් වලින් ද, Arm සමාගමේ සේවකයින් වෙනුවෙන් තවත් ඩොළර් බිලියන 1.5ක මුදලක් ද, Arm සමාගමේ මේ දක්වා ඉලක්කගත ආදායම් වලින් ඩොළර් බිලියන 5ක් ද වශයෙන් සම්පූර්ණ මුදල වන ඩොළර් බිලියන 40ක මුදල SoftBank ආයතනයට ගෙවීමට කටයුතු කරනු ලබනවා.
NVIDIA to Acquire Arm for $40 Billion, Creating World’s Premier Computing Company for the Age of AI. https://t.co/Pj0lR8W03u pic.twitter.com/6fJ9zltWz8
— NVIDIA (@nvidia) September 13, 2020
මේ වන විට Apple, Samsung මෙන්ම Qualcomm සමාගම ඇතුලු ලොව ප්‍රසිද්ධ chip නිෂ්පාදකයින් සියළුදෙනාම පාහේ භාවිතා කරනු ලබන්නේ ARM architectures වන අතර මෙම සමාගම ඩොළර් බිලියන 31ක මුදලකට 2016 වර්ෂයේදී SoftBank ආයතනය විසින් මිලදීගනු ලැබුවා.
විශේෂයෙන්ම පසුගිය වසර කිහිපය තුළ Microsoft සමාගම ඔවුන්ගේ Windows 10 මෙහෙයුම් පද්ධතිය ARM chipset සඳහා නිර්මාණය කරනු ලැබූ අතර Apple සමාගම ද Intel based chipset වෙනුවට, ඔවුන් විසින්ම නිර්මාණය කරනු ලබන ARM based processors වෙත මාරු වෙමින් පවතින බව දැකියහැකි වුණා.
කොහොම නමුත් GPU නිෂ්පාදනය පිළිබඳව ප්‍රසිද්ධියක් උසුලන Nvidia සමාගම මේ දක්වා ඔවුන්ගේ Tegra chipsets හැරුණු කොට වෙනත් Arm architectures වැඩි වශයෙන් භාවිතා නොකරන නමුත්, ඉදිරියේදී Nvidia සමාගමේ AI computing platform එක Arm සමාගමේ තාක්ෂණයන් සමඟ එකතු කිරීමට ඔවුන් බළාපොරොත්තු වෙනවා.
මේ ගැන වැඩිදුර විස්තර දැනගැනීම සඳහා නිළ Nvidia Newsroom එක සහ The Verge වෙබ් අඩවිය භාවිතා කළ හැක.