LineageOS එකේ root access ලබාගැනීම සඳහා ඇතුලත් කර ඇති superuser ක්‍රමය ඉවත් කිරීමට තීරණය කරයි

Android ජංගම දුරකථන විශාල ප්‍රමාණයක් වෙනුවෙන් නිර්මාණය කර ඇති LineageOS එක මේ වන විට ලොව තිබෙන ජනප්‍රියතම Custom ROM වලින් එකක් බව අමුතුවෙන් කිව යුතු නැහැ.

බොහෝමයක් පැරණ ජංගම දුරකථන වලට අලුත් Android සංස්කරණයක් ස්ථාපනය කරගැනීමේ ප්‍රධානතම සහ stable ම ක්‍රමය බොහෝ විට මේ LineageOS ROM එකක් භාවිතා කිරීම වන අතර මේ වන තුරු එය ස්ථාපනය කළ අවස්ථාවේ සිටම root access භාවිතා කිරීමේ හැකියාව අන්තර්ගත කර තිබුණා.

LineageOS 15.1 සංස්කරණයේ සිට මේ root access ලබාගැනීම සඳහා වන superuser manager එක addon එකක් ලෙස වෙනම ඉදිරිපත් කිරීමට මොවුන් කටයුතු කරනු ලැබුවා.

කොහොම නමුත් මීළඟ LineageOS සංස්කරණයේ, එනම් Android 10 මත පදනම් වන LineageOS 17 සංස්කරණයේ සිට මේ addon එකක් ලෙස ඉදිරිපත් කර තිබුණ superuser binary එක නතර කිරීමට තීරණය කර ඇති අතර, official ලෙස root access ලබාගැනීමේ හැකියාව ඉවත් කිරීමට මොවුන් තීරණය කර තිබෙනවා.

මේ අනුව LineageOS 17 සංස්කරණය flash කරන්නන් හට root access ලබාගැනීම සඳහා සෘජුවම ROM එක install කිරීම පමණක් ප්‍රමාණවත් නොවන අතර Magisk හෝ වෙනත් ක්‍රමයක් භාවිතා කරමින් root access ලබාගත යුතු වෙනවා.

බොහෝ විට වෙනත් Custom ROM නිර්මාණය කිරීමේදී base එක ලෙස ද මේ LineageOS එක භාවිතා කරනු ලබන නිසාවෙන් මීළඟ සංස්කරණය භාවිතා කිරීමේදී අනෙකුත් custom rom develop කරන්නන් හට ද මේ පිළිබඳව අවධානය යොමු කිරීමට සිදු වෙනවා.

Update: 12/12/2019 03:03pm
Superuser වැඩසටහන LineageOS 15.1 සංස්කරණයේ සිට addon එකක් ලෙස ඉදිරිපත් කිරීමට කටයුතු කර ඇති බව අන්තර්ගත කරමින් මෙම ලිපිය සංස්කරණය කරන ලදී.

මේ ගැන වැඩිදුර විස්තර දැනගැනීම සඳහා LineageOS Gerrit එක සහ XDA-Developers වෙබ් අඩවිය භාවිතා කළ හැක.