SpaceX ආයතනයේ Starlink ව්‍යාපෘතිය පිළිබඳව මීට පෙර අවස්ථා ගණනාවකදීම අපි ඔබව දැනුවත් කිරීමට කටයුතු කළා මතක ඇති.
Varuna Prabhath
විශේෂයෙන්ම මෙම සේවාවේ මූලික beta පරීක්ෂණ අතරතුරදී 100Mbps දක්වා වූ අන්තර්ජාල වේගයක් ලබාගැනීමට හැකියාව ලැබුණු බවත්, ඒ අතරතුරදී ඇමෙරිකාවේ ආපදා තත්ත්වයන් වලට ලක් වූ ප්‍රදේශ වල හදිසි ප්‍රතිචාර අංශයන් වෙත මෙම සේවාව භාවිතා කිරීමේ අවස්ථාව ලබාදීමත් මෑතකදී මෙම ව්‍යාපෘතිය සම්බන්ධව වාර්තා වුණු විශේෂ සිදුවීම් වෙනවා.
Chethiya Wijewickrama
එමෙන්ම මීට අදාළ තවත් චන්ද්‍රිකා 60 ක් පමණ පසුගිය සතියේදී පහළ පෘථිවි කක්ෂයේ ස්ථානගත කිරීමට SpaceX සමාගම කටයුතු කළ අතර ඒ අනුව මේ වන විට සමස්ත චන්ද්‍රිකා සංඛ්‍යාව 800 කට ආසන්න වී තිබෙනවා.
Deployment of 60 Starlink satellites confirmed pic.twitter.com/x83OvjB4Pa
— SpaceX (@SpaceX) October 6, 2020
මෙම නවතම කක්ෂගත කිරීම සම්බන්ධව Twitter පණිවිඩයක් නිකුත් කරමින් Elon musk මහතා විසින් පෙන්වා දී තිබෙන්නේ මෙම අන්තර්ජාල සේවාව මහජන භාවිතයට දැන් සූදානම් බවයි.
ඔහු පෙන්වා දෙන්නේ හදිසි සේවා සඳහා සහ ලොව පුරා අන්තර්ජාලය ලබාදී නොමැති ස්ථානවල සේවය සඳහා මෙම අභ්‍යාවකාශ අන්තර්ජාල සේවය භාවිතයට ගැනීමට හැකියාව තිබෙන බවයි.
මෙලෙස අලුතෙන්ම කක්ෂගත කරන ලද චන්ද්‍රිකා 60 නියමිත ස්ථානයට පැමිණි පසු ඇමරිකාවේ සහ දකුණු කැනඩාවේ තරමක් පුළුල් public beta සේවාවක් ආරම්භ කිරීමට හැකි වනු ඇති බව Elon Musk විශ්වාසය පළ කරනවා.
මේ අනුව Wi-Fi hotspot එකක් ලෙස ක්‍රියා කරන කුඩා ඇන්ටනාවක් භාවිතයෙන් ඕනෑම කෙනෙකුට මෙම අන්තර්ජාල සේවය ලබා ගැනීමට හැකියාව තිබෙනවා.
කොහොම වුණත් අප කලින් පුවතින් වාර්තා කළ පරිදිම මෙම සේවාව සඳහා තාරකා විද්‍යාඥයන්ගේ අප්‍රසාදය තවදුරටත් එල්ලවෙමින් තිබෙන අතර, SpaceX සමාගම පෙන්වා දෙන්නේ සිය චන්ද්‍රිකා වලින් මෙලෙස සිදුවන අපහසුතාවයන් හැකි තරම් වළක්වා ගැනීමට ප්‍රමුඛත්වය ලබා දෙන බවයි.
එය එසේ වුවත් Satellite Constellations 1 (Satcon 1 - එනම්, චන්ද්‍රිකා තාරකා මණ්ඩල නිසා තාරකා විද්‍යාවට සිදුවන බලපෑම පිලිබඳව සාකච්ඡා කරන වැඩමුළුවක්) වැඩමුළුවේදී නිකුත් කල නවතම වාර්තාවක් මගින් පෙන්වා දෙනු ලැබුවේ,වළක්වාගැනීමට මොන තරම් පියවර ගත්තද ඉදිරි පරම්පරාවේ විද්‍යා වැඩසටහන් සඳහා මෙම ව්‍යාපෘතියෙන් සිදු වන බලපෑම අවතක්සේරු කළ නොහැකිවනු ඇති බවයි.
මේ පිළිබඳව වැඩිදුර විස්තර දැනගැනීම සඳහා Independent වෙබ් අඩවිය සහ ZDNet වෙබ් අඩවිය භාවිතා කළ හැක.